काठमाडौं । नेपाल प्रिमियर लिग (एनपीएल) टी–ट्वान्टी क्रिकेट प्रतियोगितामा उत्कृष्ट नेपाली खेलाडीको अवार्ड जितेका दीपेन्द्र सिंह ऐरीले पुरस्कारको रुपमा ओमोडा ई–५ कार प्राप्त गरेका छन्।

सुदूरपश्चिम रोयल्सको कप्तान रहेका दीपेन्द्रले प्रतियोगितामा ९ खेलमा १ अर्धशतकसहित २२७ रन बनाएका थिए। बलिङतर्फ उनले ९ खेलमा ९ विकेट लिएका थिए।

प्रतियोगिताभर उत्कृष्ट प्रदर्शन गर्ने नेपाली खेलाडीलाई ओमोडाले आफ्नो ई–५ मोडेलको कार पुरस्कारस्वरूप दिएको हो। यो कार ९९ किलोवाट मोटर र ६१ किलोवाट आवरको ब्याट्री रहेको छ, जसले ४३० किलोमिटरको दूरी कभर गर्न सक्छ। नेपाली बजारमा यो कारको मूल्य ६१ लाख ९९ हजार रुपैयाँ पर्छ।

तर, दीपेन्द्रले यो कार पुरस्कारको सन्दर्भमा १५ लाख ५० हजार रुपैयाँ कर तिर्नुपर्नेछ। आयकर ऐनको दफा ८८ क अनुसार, कारको पुरस्कारमा आकस्मिक लाभ कर लाग्ने व्यवस्था रहेको छ।

यस ऐनको उपदफा १ अनुसार, यदि खेलकुद क्षेत्रमा योगदान पुर्‍याएर प्राप्त पुरस्कार पाँच लाख रुपैयाँभन्दा कम हो भने त्यस्ता पुरस्कारमा कर लाग्दैन। तर, यदि पुरस्कारको रकम पाँच लाख रुपैयाँभन्दा बढी छ भने कर तिर्नु पर्छ।

दीपेन्द्रले विगतमा पाँच लाख रुपैयाँको पुरस्कार नपाएको भए उनलाई १४ लाख २४ हजार रुपैयाँ कर तिर्नु पर्नेछ। यद्यपि, यदि उनले पहिले पाँच लाख बराबरको पुरस्कार प्राप्त गरेका थिए भने, उनीसँग १५ लाख ५० हजार रुपैयाँ करको दायित्व हुनेछ।

आयकर ऐन अनुसार, नेपाल सरकारले पुरस्कारमा लाग्ने करमा छुट दिने व्यवस्था पनि छ। नेपाल सरकार मन्त्रिपरिषद्ले निर्णय गरी दीपेन्द्रलाई करमा छुट दिन सक्छ।

यद्यपि, यदि सरकारले कर छुट नदिएको खण्डमा दीपेन्द्रले गाडी नामसारी गर्दा उक्त कर तिर्नुपर्नेछ। यातायात कार्यालयमा गाडी नामसारी गर्दा गाडीको खरिद प्रमाण वा पुरस्कार प्राप्त गर्दा तिर्नु पर्ने करको प्रमाण प्रस्तुत गर्नु आवश्यक हुनेछ।

त्यस्तै, एनपीएलमा उत्कृष्ट बलर घोषित भएका ललित राजवंशीले १७ विकेट लिएर पुरस्कार स्वरुप १० लाख मूल्यको विद्युतीय मोटरसाइकल प्राप्त गरेका छन्। उनले पनि कर तिर्नुपर्ने छ।